港大港永續

又就嚟到年廿八要洗邋遢，當小編整理枱頭上一份份喺今年print出嚟嘅文件、notes，就會心諗「唔通下世要做樹」…… 但既然唔print都print咗，妥善咁處理令呢啲資源免於被棄置到堆填區至關重要，最直接當然係將佢哋交俾回收商循環再造啦~ 將廢紙回收再造對一般大眾嚟講似乎係一個簡單過程，但其實紙品嘅回收過程相當複雜，利潤唔高，近年仲受到出口管制同廢紙價值波動，以及大眾對回收工作嘅成效存疑，令廢紙回收飽受阻滯。即使係咁，其中一位喺回收界嘅持份者 Harold一直默默耕耘十多年，認真做實事為佢嘅公司SSID Secure Information Disposal Services Limited 打出名堂。 SSID經營咗13年，一直將「確保永續的消費和生產模式」、「促使城市與人類居住具包容、安全、韌性及永續性」，以及「建設具有適應力的基礎設施，促進包容性和永續的工業化，推動創新」三個永續發展目標融入業務裡面。等我哋睇下SSID點樣從「創新能力」、「客戶供應商關係」同埋「職場文化」三個範疇實行永續營商啦！  通過「創新」打破常規 Harold喺SSID起家時就已經將RFID（無線射頻身份識別系統）應用喺機密文件銷毀同廢物追蹤。通過喺垃圾桶上安裝RFID，就可以知道垃圾來源，所得到嘅數據更能同持份者討論點樣源頭減廢。 SSID喺三年前仲開始透過成立 Mil Mill 喵坊 呢個品牌，拉近公眾同紙張回收同埋使用再造紙嘅距離，甚至同企業合作達到「紙循環」。SSID嘅運作改變企業行為，促進資源循環。  用共同語言打開合作之門 近年，好多大型企業已經開始關注永續營商。作為價值鏈中嘅下游企業，佢哋亦尋求相關知識，密切關注市場趨勢。對Harold嚟講，咁先可以喺未來同企業管理團隊對話中取得生意機會。同其他中小企業相比，SSID已經獲得好多證書，包括ISO 14000（環境管理系列認證）同埋ISO 27000（資訊保安管理系列認證）。  共融職場文化 SSID一直關注社區中嘅弱勢群體，承擔起社會責任。佢同非牟利組織匡智會建立咗長期合作關係，為殘疾人士提供就業機會。SSID仲為公司聘用嘅就職婦女安排靈活嘅工作時間，方便佢哋照顧自己家庭。 想知道SSID仲有咩中小企都適用嘅永續營商策略？快啲撳入以下嘅連結，閱讀完整版嘅《企業實踐案例》去了解更多啦！ 傳送門 https://ccsg.hku.hk/....../%e8%b3%87%e8%a8%8a%e6%a9....../

我哋之前介紹過「農林間作」（Agroforestry）(傳送門: https://bit.ly/3OSMqN4 )作為永續農業嘅一種操作方式，今次就等我哋還原基本步，同大家講下其實要做到「永續農業」，有咩大原則要做到喇～ 根據聯合國糧農組織提出嘅永續農業大原則：  第一個原則係要提高資源利用效率，透過調整農業操作、提升設備效率等等，提高農業生產力。例如，以噴灌或者滴灌取代傳統嘅地面漫灌模式，提高用水效率。  第二，保護同強化自然生態系統，例如避免單一栽培、過度用水、依賴化肥同化學殺蟲劑等等嘅農業模式，以免導致污染同生態系統退化。  第三，保障同改善農村生計同社會福祉，減輕貧富懸殊同資源分配不均嘅狀況，如賦權農夫更有效管理土地同水資源應用，協助農夫進入同埋參與當地乃至國際市場。  第四，加強人民、社群以及生態系統嘅韌性，提升農村社區抵禦極端氣候、市場波動等威脅嘅能力。例如，引進抗蟲、抗旱嘅作物品種，可以幫助抵禦農業災害。  第五，促進自然同人類系統嘅良好管治，喺政策、法規、制度上，支持永續農業發展，推出誘因措施，鼓勵農民採用永續農法。 想知呢啲原則可以點樣實行？ 歡迎閱覽我地嘅永續農業網上學習資源（http://foss2.hku.hk/ecase_scalar/sustainable-agriculture/）。裡面除咗有介紹永續農業嘅原則同埋操作方式，亦都有提供本地以及海外嘅實例。其中我地喺 #荔枝窩 復耕嘅案例就有提到我地點樣透過生態調查、適切技術、複合種植、社區農業等等，保護自然生態系統，活化農村生計，同埋加強社群韌性。

雖然已經過咗夏天，不過仲有啲熱呀！襯而家仲可以捉緊夏天嘅尾巴，玩水上活動消消暑！除咗近年大熱嘅滑水、獨木舟、直立板，你有冇諗過香港都有得潛水？本地就有一間 #潛水訓練學校「潛水歷險會 Diving Adventure」廿幾年嚟積極推廣潛水運動，仲擔起環境保護嘅責任。 好多時生態保育都俾人一個感覺就係「洗錢做好事」﹐但對於本地潛水訓練學校「潛水歷險會」創辦人區紹堅（區sir） Au Stephen 嚟講﹐如果只係顧住消費海洋生態的話，隨時連佢哋呢個行業都要消失！喺訪問佢就提到海洋保育唔單止係一種 #社會責任，仲係延續生意之道。一旦水質唔好，海底一片灰濛濛，市民潛水觀賞海洋生物嘅意欲就減少，生意自然差少少。「破壞永遠係最快」﹐但係保育又需要大量人力物力﹐於是區Sir就動動腦筋﹐以唔同方法去推動保育工作。 係消費者定係保育者？只係一線之差 潛水歷險會積極研究出同商業模式結合嘅 #保育活動，鼓勵學員享受潛水樂趣之餘，同時加強佢地對保護環境嘅意識。 #海岸清潔馬拉松 就係一個好例子，學員參與Fun Dive嘅商業潛水時﹐會利用中間約兩小時嘅休息時間，同漁農自然護理處合作﹐清潔附近海灘，藉此為海洋保育出一分力。 除咗推動潛水運動普及化，潛水歷險會亦致力促進 #社會共融。例如為傷健人士提供潛水訓練，幫助佢哋突破身體上嘅限制，享有同健全人士平等嘅機會。喺水入面無分你我，享受潛水嘅樂趣，體現共融。呢份對弱勢社群的關懷，有助建立長久嘅客戶關係，逐步建立一個多元、包容嘅環境。 如果想了解更多潛水歷險會嘅永續營商思維，歡迎撳入以下嘅連結，閱讀完整版嘅《企業實踐案例》。 傳送門>>> https://bit.ly/3yE3QGl

想種嘢就要開墾農地，咁係咪就一定要剷除樹林？唔一定嘅～ Agroforestry（#農林間作，又稱「混農林業」）就係永續農業嘅其中一種操作方式，會喺農田裡面保留／種植樹木，或者喺樹林裏面種植農作物，從而改善自然環境，同時促進農作物生產。 例如喺巴西亞馬遜州嘅城鎮阿普伊 （Apuí），農戶長期喺無樹木嘅農地上面種植咖啡，土壤退化問題嚴重，令產量下降，結果導致咖啡園荒廢。2012年，亞馬遜保護和可持續發展研究所（Idesam）就開始協助農戶用農林間作法喺園內重新種植咖啡，農戶獲得經費同埋當地原生樹種嘅樹苗，用嚟復育咖啡園。除咗咖啡之外，園內亦種植咗木材、水果、果仁等等，令農戶嘅收入來源更加多元化。咖啡產量幾乎倍增，農民生計得以改善。 喺香港，我哋中心亦喺 #荔枝窩 實驗緊農林間作法。荔枝窩嘅農地經歷長年荒廢，逐漸被次生林完全覆蓋。為咗保育荔枝窩嘅生態價值，當初開田復耕嘅時候特別保留咗原生嘅大樹同埋稀有樹種，再喺原生嘅樹林下面種植薑同咖啡等耐陰作物，增加樹林嘅生產力。我哋亦都有喺部分農林間作區裡面加入木瓜同埋其他不同高度嘅農作物，目的係模仿天然樹林嘅多層結構，一來充分利用空間，二來亦希望用不同植物製造適合嘅生長環境，甚至抑制雜草生長。 全球愈來愈關注農業嘅可持續性，「農林間作」嘅模式亦更加受到重視。如果大家想對「農林間作」認識更多，可以閱覽我地嘅網上學習資源（http://foss2.hku.hk/ecase_scalar/agroforestryinhk/）。

我哋商界永續發展領袖計劃嘅項目就成日推薦企業透過價值鏈協作共同推動業務發展，但除咗叫你哋嘅業務夥伴拍膊頭幫幫手之外，仲有冇啲咩方法可以商業運作同業務上實踐永續價值鏈，令協作夥伴有誘因去做呢件事呢？ 喺物業發展同管理行業，近年就興起一種叫「綠色租約 」(Green Lease) 可具約束力嘅協議，鼓勵業主同租戶合作實踐永續目標、改善能源表現。其實有部份香港嘅物業業主都用緊呢種工具去影響佢哋嘅租客。作為協議嘅一部分，綠色租約常見嘅條款如下： 1) 以廢物審計為例，租戶需同意安裝測量設備，以記錄及分析其廢物的棄置、分類及回收情況。 2) 業主亦可能會要求租戶允許其進入場所以進行能源審計，確保收集翻嚟嘅數據可以反映實際能源使用情況。 3) 租戶可能會被邀請加入綠色團隊 (Green Team) ，定期出席會議以報告各項措施的進度。 為咗吸引租戶參與其中，好多時候業主同租戶會攤分安裝有關設備同落實措施嘅成本，而雙方可以分別從中獲得經濟回報，例如有效嘅能源管理能節省開支，所以係 cost and profit sharing 嘅好例子。綠色租約有助履行永續目標，將ESG推動到租戶層面可以大大提升其影響力。業主同租戶保持良好而緊密嘅關係，相信能更有效地應付永續挑戰。 長遠嚟講，綠色租約鼓勵租戶採購綠色材料、產品同設備。當租戶搬出嘅時候，可以喺原樣條件 (“as-is” condition) 下保持靈活性，咁就唔會因為裝修工程而造成浪費！根據The Institute for Market Transformation 2015年研究，假如所有美國租賃辦公室都推行綠色租賃，市場每年可以節省高達 33 億美元嘅成本，同時減少大約 22% 能源消耗。每平方英尺公用事業支出足足慳咗 0.51 美元咁多！實行綠色租約既減碳又可以降低成本，可謂一舉兩得！ 講到有咁多好處但點解遲遲都未見所有龍頭企業落力實行綠色租約呢？商界環保協會 2019年就發表左報告指出投資改善能源效益對業主和租戶雙方嘅吸引力都唔夠大，特別喺普通辦公室租約一般只有三年，比主要提升能源效益改造工作的回本期為短。再者，租戶在交還單位時要根據條款恢復單位原狀，令投資節能的意願更低。 針對呢兩點﹐其實可以參考悉尼同紐約市嘅例子，透過更改及放寬租約條款，喺唔需要恢復單位原狀條款情況下提供更長租期。現階段香港應該著手提供更多誘因俾業主同租戶。 參考資料︰ - BEC最新研究建議業主與租戶合作提升物業節能表現 全港性建築物能耗基準有助檢視能源效益 | 商界環保協會: https://bec.org.hk/tc/node/264

不論有無回收廢物習慣嘅你﹐相信近日都有可能睇到一則有關本港唯一一間紙包飲品盒回收廠「喵坊」(Mil Mill) 位於元朗工業邨嘅廠房﹐因為租約問題而面臨停運嘅新聞。點解會引發咁多社區討論？就等我哋同大家去了解下Mil Mill對本地綠色工業嘅角色同香港回收業現況啦！ 近年香港以及全球各地都響起淨零排放以及減廢嘅口號﹐而好多國家嘅永續發展政策都不約而同以促進循環經濟嘅方向去制定為環境目標之一。不過﹐循環經濟能否實現就同業務價值鏈嘅組成息息相關﹐因為上游嘅產品製造、加工、運輸過程以至消費者使用產品有時都無可避免地會產生廢物。 循環經濟提倡嘅「資源循環」概念就係鼓勵大家思考既然廢物已經產生﹐咁究竟將呢啲廢物送去堆填區之前仲有無其他出路﹐令佢地繼續成為可使用嘅資源。除左傳統業務價值鏈上嘅持份者之外﹐循環經濟更加突顯同下游夥伴協作嘅重要性。試想像如果缺乏如Mil Mill 呢一類型嘅下游回收商﹐將廢物加以利用﹐即使回收數字增加又如何促成循環經濟嘅發展呢？ 可能大家會諗﹐Mil Mill唔係本地嘅唯一回收商﹐咁仲有其他業界能夠帶動本地綠色工業？但係根據2020 年 嘅香港固體廢物監察報告嘅數據，本港紙料回收物料嘅總回收量為 442,100公噸，當中只有7,900公噸 (佔總數只有1.7%) 喺本地循環再造﹐其他都需要出口 往內地及其他國家作循環再造。呢種出口主導嘅處理模式始終會受限於其他地區的廢物進口政策，以及回收品價格波動嘅影響，長遠而言不利回收業界嘅整體發展，本港回收商亦難以推行在地嘅再造處理以減少運輸而帶來的碳排放。就此，政府應釋放土地資源、提供財務誘因和加強環保物料的科研，積極推動發展本地廢料循環再造的產業鏈，確保轉廢為材供本地市場應用。 而喺Mil Mill呢個例子入面﹐佢除咗擔當處理回收紙品嘅角色，亦都透過東南亞嘅紙廠將紙漿製造成為自家品牌嘅廁紙及抹手紙﹐減廢同時製造到全新嘅經濟效益﹐對於回收商同埋參與回收嘅企業或市民都係雙贏﹐實屬本地難得嘅例子。 儘管Mil Mill嘅規模唔係話好大，但對於本地整體紙品回收處理嘅貢獻有目共睹﹐而佢嘅存在以至營運模式中包含對公眾環保意識嘅教育，實在值得有志發展綠色工業嘅企業家借鏡。如果喺呢個時候已經要面臨停運﹐不免令人感到可惜。唔知大家又覺得香港仲有啲乜野政策可以配合令本地綠色工業發展得更好？